Ангилал: Мэдээ мэдээлэл
Монгол хэлний зөв бичих дүрмийн асуудлаар эрдэмтэд зөвлөлдлөө
Боловсрол,соёл шинжлэх ухааны яамнаас "Монгол хэлний зөв бичих дүрмийг боловсронгуй болгох мэргэжлийн зөвлөгөөн"-ийг 2011 оны 6-р сарын 10-11-нд зохион байгууллаа. Зөвлөгөөнд Төрийн хэлний зөвлөл, МУИС, ШУА, МУБИС, Боловсролын хүрээлэнгийн эрдэмтэд, их дээд,ерөнхий боловсролын сургуулийн монгол хэл, уран зохиолын багш нар, хэл судлаачид оролцов. Зөвлөгөөнөөр хэлэлцсэн гол сэдэв нь кирил бичгийн зөв бичих дүрэм,олон хувилбараар бичдэг үгсийг нэг мөр болгон оноон тогтоох асуудал байв. Зөвлөгөөнийг нээж Монгол Улсын Засгийн газрын гишүүн, Боловсрол ,соёл, шинжлэх ухааны сайд бөгөөд Төрийн хэлний зөвлөлийн дарга Ё.Отгонбаяр хэлсэн үгэндээ өнөө хэрэглэж байгаа кирил бичгийн зөв бичгийн дүрмийг засан сайжруулах шаардлага,олон хувилбараар бичиж байгаа үгсийг нэг мөр болгон оноон тогтоох талаар Төрийн хэлний зөвлөл, БСШУЯ-наас хийж ирсэн ажил, цаашдын зорилтын талаар илтгэв.
Зөвлөгөөнд МУБИС-ийн захирал, академич Б.Жадамбаа "Кирил бичгийн зөв бичих дүрмийг журамлан боловсруулах мэргэжлийн зөвлөгөөний үйл ажиллагааны зорилго,чиглэл", академич Д.Төмөртогоо,доктор,профессор Ц.Өнөрбаян нар "Кирил бичгийн өнөөгийн хэрэглээнд өөр өөр хувилбараар бичигддэг үгсийг жигдлэх зарчим", Боловсролын хүрээлэнгийн захирал,доктор, профессор Н.Бэгз, эрдэм шинжилгээний ахлах ажилтан доктор,профессор Д.Баттогтох, эрдэм шинжилгээний ажилтан Ш.Оюунцэцэг нар "Зөв бичих дүрмийн талаар ерөнхий боловсролын сургуулийн сургалтад тохиолдож буй бэрхшээлтэй асуудлууд" илтгэлийг тавьж хэлэлцүүлэв.
Боловсрол ,соёл,шинжлэх ухааны сайдын тушаалаар Кирил бичгийн зөв бичих дүрмийг боловсронгуй болгох мэргэжлийн комиссыг байгуулсан бөгөөд зөвлөгөөнд оролцогчид өөр өөр хувилбараар бичигддэг үгсийг үсгийн дарааллаар хэлэлцэн хойшид нэг мөрөөр хэрэглэх хувилбарыг тогтоов.
Зөвлөгөөнөөр хэлэлцэн тогтсоны дагуу нэг мөрөөр бичих үгсийг багтаасан товхимол хэвлэн гаргах бөгөөд төрийн болон төрийн бус байгууллага, хэвлэл мэдээллийн хэрэгслийн редакциуд, ном хэвлэдэг байгууллага, бүх шатны сургуулийн багш нар, тэдгээр сургуулийн сурах бичгийг зохиогчид,хянан тохиолдуулагч нар, зар сурталчилгааны агентлагуудад хүргүүлж, мөрдөх ажлыг яаралтай эхлүүлнэ.
Кирил бичгийн зөв бичих дүрмийг боловсронгуй болгох мэргэжлийн комисс кирил бичгийн зөв бичих дүрмийг орчин үеийн хэлшинжлэлийн онол, монгол хэлшинжлэлийн өвд тулгуурлан засан сайжруулах,хэрэглэн хэвшүүлэх ажлыг зохион байгуулна.
БОЛОВСРОЛ, СОЁЛ, ШИНЖЛЭХ УХААНЫ ЯАМНЫ
ХЭВЛЭЛ, МЭДЭЭЛЛИЙН АЛБА
